विद्यार्थ्यांना दर्ग्यात नेऊन नमाज पठण, चौकशी अहवालात ठपका; मात्र कारवाई ठप्प का? ग्रामस्थातून संतप्त प्रतिक्रिया

प्रतिनिधी
जेजुरी, दि. १३ मठवाडी (बेलसर) ता. पुरंदर येथील जिल्हा परिषद प्राथमिक शाळेत विद्यार्थ्यांना दर्ग्यात नेऊन नमाज पठण घडवून आणल्याच्या प्रकरणावर अद्याप कारवाई न झाल्याने ग्रामस्थांमध्ये संतापाचे वातावरण आहे. सहा महिने उलटूनही शिक्षण विभागाकडून कोणताही निर्णय न झाल्याने गावात पुन्हा तणाव वाढला आहे.
गावकऱ्यांनी व विश्व हिंदू परिषदेने केलेल्या तक्रारीनंतर गटशिक्षणाधिकारी वैभव डुबल यांनी चौकशी समिती नेमली होती. विद्यार्थ्यांच्या जबाबांनंतर सादर केलेल्या अहवालात २५ मार्च २०२५ रोजी उपशिक्षिका उल्का दुर्गाडे यांनी विद्यार्थ्यांना दर्ग्यात नेल्याचे सिद्ध झाले. शिक्षकांचे म्हणणे की “सर्वधर्मसमभाव” विषयावर मूकनाटिका झाली; मात्र विद्यार्थ्यांनी नमाज पठण झाल्याचे सांगितल्याने जबाबात विसंगती आढळली आहे.
वरिष्ठांची परवानगी न घेता विद्यार्थ्यांना धार्मिक स्थळी नेणे,घटनेची माहिती वरिष्ठांना न देणे,तसेच दर्ग्यातील मौलानांनी दिलेली रोकड शाळेच्या खात्यात जमा न करता तात्काळ खर्च केल्याचेही अहवालात नमूद आहे. घटनेनंतर गावात जमाव जमून पोलिस बंदोबस्त लावावा लागला होता.
याबाबत सहा महिने कोणतीही कारवाई न झाल्याने ग्रामस्थांनी जिल्हा परिषद मुख्य कार्यकारी अधिकाऱ्यांकडे लेखी तक्रार दिली.”दोषी शिक्षकांना तात्काळ निलंबित करुन शाळेत नवीन शिक्षक नेमावेत; अन्यथा आंदोलनाचा मार्ग अवलंबू,” असा इशारा त्यांनी दिला आहे.
दरम्यान, ही शाळा अजून ही वादग्रस्त होत आहे. नुकतीच शाळा व्यवस्थापन समितीची स्थापना करण्यात आली. मात्र ग्रामपंचायतीला याबाबत पूर्वकल्पना न देता मनमानी पद्धतीने समिती तयार केल्याचा आरोप उपसरपंच धीरज जगताप यांनी केला. “शिक्षक विलास दुर्गाडे गेल्या तीन ग्रामसभांना गैरहजर राहिले आहेत.समितीची रचना पारदर्शक नसल्याने आम्ही याबाबत वरिष्ठांकडे तक्रार करणार आहोत,” असे त्यांनी सांगितले.
या सर्व घडामोडींवर संपर्क साधला असता शिक्षक विलास दुर्गाडे यांनी कोणतीही प्रतिक्रिया दिली नाही.