पुरंदर मिल्कची २२ वी वार्षिक सर्वसाधारण संपन्न,दूध उत्पादक सभासदांना बोनस व तूप वाटप

सासवड ( प्रतिनिधी ):-
दिवंगत लोकनेते चंदूकाका जगताप यांच्या संकल्पनेतून पुरंदर मधील शेतक-यांसाठी उभ्या राहिलेल्या ३ हजार ५१० हजार सभासदांच्या मालकीच्या पुरंदर मिल्क अँड ऍग्रो प्रो लि खळद या संस्थेमुळे पुरंदर आणि परीसरातील शेतकऱ्यांना दुधाचे दर चांगले मिळत आहेत. अनेक दुध उत्पादक संस्था आल्या – गेल्या मात्र गेली सलग २२ वर्षे अखंडपणे दुध संकलन करणारी पुरंदर मिल्क ही एकमेव संस्था असल्याचे संस्थेचे संस्थापक आमदार संजय जगताप यांनी सांगितले. सोमवारी ( दि ५ ) संस्थेच्या खळद – गोटेमाळ येथील कोल्ड स्टोअरेजमधे संस्थेची २२ वी वार्षिक सर्वसाधारण सभा संस्थेच्या जेष्ठ संचालिका आनंदीकाकी जगताप यांच्या अध्यक्षतेखाली आणि संस्थेच्या अध्यक्षा आणि व्यवस्थापकीय संचालिका राजवर्धिनी जगताप यांच्या उपस्थितीत संपन्न झाली.

 यावेळी दुध उत्पादकांना ३५ पैसे प्रतिलिटर बोनस एकूण २१ लाख रुपयांचा आणि सभासदांना १ किलो तूप वाटपाचा ( १९ लाख ३० हजार रूपये ) शुभारंभ आमदार संजय जगताप, संस्थेच्या अध्यक्षा राजवर्धिनी जगताप, आनंदीकाकी जगताप, संत सोपानकाका सहकारी बँकेचे उपाध्यक्ष रमणिकलाल कोठडिया व संचालक मंडळाच्या उपस्थितीत संपन्न झाला. दररोज ४२ हजार लिटर दूध संकलन होत असून गोकुळ डेअरीलाही दररोज एक टँकर दुधाचा पुरवठा केला जात आहे. यावेळी इग्लू कोल्ड स्टोअरेज विस्तारीकरण, आनंदी फ्रोजन ट्रीटच्या शाखांचा विस्तार करणे, डाळिंब ज्यूसचे पॅकिंग, कोल्ड स्टोअरेज ला सौर ऊर्जेचा आधार देणे याप्रमाणे संस्थेच्या वाढीबरोबरच दुध उत्पादकांच्या फायद्यासाठी संस्थेच्या अध्यक्षा राजवर्धिनी जगताप व संचालक मंडळाने अनेक निर्णय घेतले असून पुढील काळात शेतकऱ्यांसाठी शेतीपुरक व्यवसायांबाबत विविध प्रकल्प सुरू करणार असल्याचे आमदार संजय जगताप यांनी सांगितले. 

संस्थेला यंदा दुध व दुग्धजन्य पदार्थ विक्री, संस्थेचा पेट्रोल पंप, वजन काटा आणि कोल्ड स्टोरेज मधून ४२ कोटी ७ लाखांचा व्यवसाय झाला आहे. दहा हजारांहून अधिक गवळी, ७० दुध संकलन केंद्रातून यावर्षी जवळपास १ कोटी २ लाख ६५ हजार लिटर दुध संकलन केले. एकही दिवस संकलन बंद ठेवले नाही. संस्थेचे स्व भांडवल २५ कोटी, मालमत्ता १०० कोटींची असून २३ लाख ५८ हजार रुपयांचा नफा झाला आहे. स्व चंदूकाका जगताप घालून दिलेल्या आर्थिक शिस्तीप्रमाणे कामकाज सुरु असल्याचे आमदार संजय जगताप यांनी सांगितले. दरवर्षीप्रमाणे भागधारकांना १ किलो प्रमाणे यंदाही तूप वाटप कारण्यातास सुरुवात झाली असून दि ५ सप्टेंबर पासून पुढे महिनाभर संस्थेच्या खळद येथील कार्यलयातून हे वाटप होणार आहे. यासाठी आधारकार्ड आवश्यक असल्याचे संस्थेकडून सांगण्यात आले. 

संस्थेच्या इग्लू कोल्ड स्टोअरजेजची क्षमता ५ हजार ८०० मेट्रिक टन असून यामधे विविध फळे, फूले, धान्य, पल्प आदी प्रक्रिया केलेले पदार्थ ( - २२ ते +८ अंश सेल्सिअस) नियंत्रित तापमानात साठवून ठेवता येतात. यामुळे पुरंदरसह परीसरातील शेतकऱ्यांना फायदा होत असल्याचे सीईओ राजेंद्र मांढरे यांनी सांगितले. यावेळी प्रातिनिधिक स्वरूपात ७ गवळ्यांना बोनस वाटप, सभासदांना तूप वाटप करण्यात आले. याप्रसंगी पंचायत समितीच्या सदस्या सुनीता कोलते, कात्रज दुध संघाचे संचालक तानाजी जगताप, सोमेश्वर सहकारी साखर कारखान्याचे संचालक तुषार माहूरकर, पुरंदर मिल्कचे संचालक पै मोहन जगताप, विठ्ठल मोकाशी, शशिकांत दाते, पै आण्णा कामथे, अविनाश वाघोले, संजय ताकवले, शंकर कड, त्रिंबक माळवदकर, विलास जगताप, साजिद बागवान, बाळासो बहिरट उपस्थित होते. प्रतिनिधी शरद कामथे, अक्षय भिसे, प्रियांका मुधळे, तुषार खळदकर, अक्षय जैनक, संतोष जगताप, रणजित जगताप आदींनी नियोजन केले. जेष्ठ संचालक प्रदीप पोमण यांनी प्रास्ताविक, अनिल उरवणे आणि संभाजी जगताप यांनी सुत्रसंचलन, आॅडीटर प्रवीण कुमार यांनी अहवाल वाचन केले तर विठ्ठलराव मोकाशी यांनी आभार मानले.