पुरंदर मिल्क कडून चार हजार जनावरांना लंपी चे लसीकरण
जेजुरी, दि.१८ लंपी आजाराने सर्वत्र थैमान घातले असल्याने शेतकरी वर्ग चांगलाच अडचणीत आला आहे. शासकीय पातळीवरून ही या रोगाला आटोक्यात आणण्यासाठी प्रयत्न सुरू आहेत. यात दुग्ध उत्पन्न करणाऱ्या संस्थानी ही पुढाकार घेतला असून पुरंदर तालुक्यातील पुरंदर मिल्क ने आज अखेर सुमारे साडे तीन हजार जनावरांना या रोगाचे लसीकरण केले असल्याची माहिती पुरंदर मिल्क चे व्यवस्थापक राजेंद्र मांढरे यांनी सांगितले.
पुरंदर मिल्क चे दररोजचे सुमारे चाळीस हजार लिटर दूध संकलन आहे. संस्थेशी तीन हजार दूध उत्पादक शेतकरी निगडीत असून त्यांच्याकडील सुमारे साडे आठ हजार जनावरे आहेत. लंपी चा प्रादुर्भाव रोखण्यासाठी संस्थेने मोफत लसीकरण हाती घेतले असून आतापर्यंत चार हजार जनावरांना लसीकरण केले आहे. काळदरी, मांढर या खोऱ्यात शंभर टक्के लसीकरण करण्यात आले आहे. भिवडी, कोडीत, नारायणपूर, पोखर, पिसर्वे, गुर्होळी, सासवड, साकुर्डे, शिवरी, मुंजवडी, पारगाव, आदी ठिकाणी लसीकरण सुरू आहे. अशी माहिती दूध संकलन विभागप्रमुख डॉ. अक्षय भिसे यांनी दिली.
पुरंदर मिल्कच्या अध्यक्षा यांच्या संकल्पनेतून संस्थेशी निगडीत असणाऱ्या सर्वच जनावरांना मोफत लसीकरण करण्यात येत असून लंपी आजाराला दूध उत्पादकांनी घाबरून जाऊ नये. संस्था तुमच्यासोबत असून आपल्या दुभत्या जनावरांना ताबडतोब लसीकरण करून घ्यावे. संस्थेशी संपर्क साधावा असे आवाहन अध्यक्षा राजवर्धिनी जगताप यांनी केले आहे.