जेजुरी गडावर येळकोट येळकोट जयमल्हार, लाखावर भाविकांची गर्दी..

जेजुरी, दि. २९ ( प्रतिनिधी ) तीर्थक्षेत्र जेजुरी गडावर चंपाषष्टीचे औचित्य साधून सुमारे एक लाखांवर भाविकांनी दर्शन घेतले. ‘सदांनंदाचा येळकोट’, ‘येळकोट येळकोट जय मल्हार’ च्या गजरात भंडार खोबर्‍याच्या उधळणीत भाविकांनी रांगा लावून कुलदैवताचे दर्शन घेतले. गडावर आणि शहरात सर्वत्र कुलधर्म कुळाचाराचे धार्मिक कार्यक्रम तसेच देवाचा जयघोष ऐकू येत होता. भंडार खोबर्‍याच्या मुक्त हस्ताने करण्यात आलेल्या उधळणीमुळे संपूर्ण गडकोट पिवळ्या जर्द भंडार्‍याने माखल्यामुळे सोन्याच्या जेजूरीचा भास होत होता.

आज सकाळी देवाची महापूजा, महाभिषेकानंतर बालदारीतील घट उठवण्यात आले. त्यानंतर घराघरातील ही घट उठले. देवाला वांगे भरीत कांद्याची पात भाजी रोडग्याचा नैवेद्य दाखवून उत्सवाचा उपवास सोडण्यात आला.
दरवर्षी मार्गशीर्ष शुद्ध प्रतिपदा ते मार्गशीर्ष शुद्ध षष्ठी या कालावधीत जेजुरी गडावर चंपाषष्टी उत्सव साजरा होतो. प्रतिपदेपासून मार्तंड भैरवाने दानवांशी युद्ध सुरू केले ते सहा दिवस चालले. षष्ठीला देवाने दानवांवर विजय मिळवला. ऋषी मुनींनी चाफ्याच्या फुलांनी देवाची पूजा करून विजय दिवस साजरा केला अशी आख्यायीका असून तेव्हापासून हा उत्सव साजरा होत आहे. या सहा दिवसात राज्यातून लाखो भाविक जेजुरी गडावर येवून देवदर्शन घेत असतात. जेजूरीकर ही हा उत्सव मोठ्या उत्साहात साजरा करतात.
येथील जय मल्हार चंपाषष्ठी अन्नछत्र प्रतिष्ठानने विविध धार्मिक कार्यक्रम प्रतिष्ठानकडून करण्यात आले. त्याच बरोबर सलग सहा दिवस जेजुरी गडावर येणार्‍या भाविकांना या दुपारचे मिष्टान्न भोजन ही देण्यात येत होते. सहा दिवसात हजारो भाविकांना अन्नदान करण्यात आले.

आज सकाळ पासूनच जेजुरीत भाविकांची मोठी गर्दी होती. पो.नि. उमेश तावसकर यांच्या मार्गदर्शनाखाली जेजुरी पोलिसांनी वाहतुकीबरोबरच बंदोबस्त चोख ठेवला होता. मार्तंड देवसंस्थानचे सर्व विश्वस्त त्याच बरोबर देवाचे मुख्य पुजारी व जय मल्हार चंपाषष्ठी अन्नछत्र प्रतिष्ठानचे अध्यक्ष गडकोटावर जातीने हजर राहून भाविकांच्या सोयी सुविधावर लक्ष ठेवून होते.

भाविकाकडून देव दर्शनाबरोबरच कुलधर्म कुळाचाराचे धार्मिक विधी उरकण्यात येत होते.